– Dorvvolašvuođa oažžut ráhkkaneami bokte. Evahkkobagadus lea deŧálaš reaidu ássiide, vai buohkat dihtet maid sii galget dahkat ovdal evahkkui mannama, evahkku áigge ja maŋŋá eváhkkus máhccama, dadjá Unjárgga sátnejođiheaddji Berit Ranveig Nilsen.
Bagadusas nevvojuvvo earret eará:
- Makkár dilis eaktodáhtolaš dahje bákkolaš eváhkkui mannan sáhttá šaddat áigeguovdilin.
- Heahtelávkka ráhkadeami birra ja mat juohke viesus berrejit gávdnot heahtevuorkkás.
- Mo olmmoš berre meannudit iešguđetge kriisadiliin, omd. elrávdjeboatkaneapmi, interneahttafalleheapmi ja maiddái soahtedilis.
- Oppalašgovva deaivvadanbáikkiin kriisadilis.
Bagadus juhkkojuvvo buot viesuide boahtte vahkkus, ja dan sáhttá maiddái viežžat gieldda ruovttusiiddus.
Dát lea oassin viiddis gearggusvuođaráhkkaneamis Unjárggas. Ovdagoddi áigu čakčamánus meannudit galgágo gielda oastit heahteborramuša buot gieldda ássiide 10 beaivái - dákkár doaibmabidju livččii áidalunddot Norggas.
– Mii sávvat ahte buohkat asttašedje lohkat bagadusa. Das bohtet ovdan dieđut, mat soitet leat mearrideaddjin, jus gártat kriisadillái, dadjá sátnejođiheaddji.
Bagadusa duogáš
Bargu lea jearahallaniskkadeami boađusin, mii čađahuvvui gieldda ássiiguin 2024 čavčča ráhkkaneami ja eváhkku birra. Das bođii ovdan ahte máŋggas ohcaledje eambbo dieduid dan birra maid ieža sáhtášedje dahkat. Bagadusas čuovvuluvvo maiddái giella riska-- ja hearkkesvuođaanalysa (ROS-analysa), mii gergejuvvui dán giđa.
Ohcal fal bagadusa iežat poastakássas boahtte vahku, ja vurke dan. Dat lea ráhkaduvvon dutnje ja du bearrašii – ja min searvevuhtii Unjárggas.
Evahkkobagadusa oažžu maiddái viežžat ráđđevisttis, girjerádjosis ja doavttirkantovrra vuordinlanjas Nyborggas.
