Leat go gaskal 12 ja 23 jagi, ja dárbbašat muhtima geainna háleštit? Leatgo dus lossa jurdagat, dovddatgo ahte šaddá ollu, dahje don soaittát rahčat streassain, heajos nahkáriin, dahje baluin? Háleš lea du várás! Mii leat nuvttá gielddafálaldat mii fállá ságastallamiid, ja min ulbmil lea doarjut du váttis áiggiin ja veahkehit du dustet hástalusaid ovdal go dat sturrot.

Min luhtte sáhtát oažžut háleštit buot áššiid birra mat čuhcet du psyhkalaš dearvvašvuhtii, leš dal streassa skuvllas, váivves dovddut, oktonasvuohta, gaskavuođat dahje eará. Ii dárbbaš leat diagnosa dahje stuorra váttisvuođat váldit oktavuođa - mii leat dás maiddái daid smávva áššiid várás mat sáhttet šaddat stuorrát áiggi mielde.

Min lea álki olahit. Mii eat dárbbaš čujuhusa, ja don sáhtát váldit njuolga oktavuođa telefovnna dahje e-poastta bokte. Sáhtát maid jearrat muhtumis geasa luohtát - skihpáris, bearašlahtus dahje oahpaheaddjis - veahki vuosttaš lávkái. Mii fállat dutnje ságastallama viđa beaivvi siste.

Mii heivehit du dárbbuide - mii sáhttit deaivvadit iežamet kantuvrras, du ruovttus, olgun tuvrras dahje biillas, dan botta go mii vuojašit. Skuvlaoahppiide leat mii olámuttus skuvllas juohke duorastaga tii. 12 rájes 16 rádjái, rabas uvssain. Deike sáhtát dušše boahtit ságastallamii vaikko it leat ovddalgihtii šiehtadan áiggi.

Leat go váhnen ja fuolas iežat nuora dihtii? Mii sáhttit maiddái rávvet ja doarjut jus dan dárbbašat.

Háleš lea dás ovddidan dihtii buori psyhkalaš dearvvašvuođa ja galgá leat oadjebas báiki gos beasat hállat dan birra mii lea dutnje dehálaš. Árrat gieđahallat váttisvuođaid sáhttá dahkat stuora erohusa - mii leat dás veahkehan dihte du.